Scheda n. 7871

Lena mo’ sì ca propeto me sento
Comm’a scigna correvato
pe sto tratto che d’aie desgraziato.
Se tratta lo pover’ommo p’amarte
E bole bene che trummiente
E che pene e d’amice e pariente
Aggio suffruto e quanno m’aspettava
D’averene da te na recombenzia
Comm’a lo ben servire
M’a mancato pettene
Torca de varvaria
Co tanta crepansiglia che m’aie fatto
desperato pe fareme morire.
Mo’ sì ca te prommetto
Nnante me shiaffa annotta
Me scenna lengua ncanna
E li diente me cadeno e le mole
Si te sguardo o te dico di parole.

Va scortese nfedele teranna
Va te trova chi t’amma e t’adora
Ca pe mene non faie cchiù no.
Po cca pienze pegliarme pe ccanna
Co sta gratia ch’attraie e nammora
Ma si’ pazza scordà te lo può.

Ma no: chian no poco: nigro te, scuro te,
M’ero scasato potarraie campare
Senza lo core tuio che te ne pare?
Marome sbentorato mo’ si è sparuta
Chello po’ de speranza che ngera rommanuta.
Oh che me fosse dato
Pepitola alla lengua
Nnante d’avere ditto ste parole
Pocca tocca e non tocca sentarria
Sti sciattiglie che sento Lena mia.
Ma no gioia mia cara
Veccome addonocchiato
Nnant’alli piedi tuoi e tienete pe cierto
Cha maie me portarraggio
Nzia tanto sentarraggio
Ca sta vocca affatata che perdonato mmaie
E ca vuo’ da lo trunco a tanta guaie.

Bellezza cara mia taggio affiso è lo ve’
Ma co la vocca sì no co lo core.
Chesta non è boscia
Agge creddito a me
Ca ne vorria morì pe lo dolore.