Scheda n. 7022

Ncoppa a ponte Lecciardo
A dove s’arrecettano l’impise
Lo sbentorato Rienzo
Che pe Cecca sperava parpatejava
Comm’a Ciuccio così forte arragliava
Ah ah ah ah me ne ha ncappato affè

Chillo zingaro marditto
Ceca uoccola d’Amore
M’ha redduto chisto core
Negrecato arzo et afflitto.

Chesta faccie è fatta secca
So tornato com’a n’ascio
Pe bolere bene a Cecca
Me ne vao pe l’acqua a bascio.

E non faccio auto che de continuo
Io chiango e trivolo strellare oimè
Ah ah ah ah me n’cha ncappato affè.
Dimme pideto mbraca
Santariello de cimbalo
Piscia lietto guallecchia
Perché me ffai schiattare
Pe cheste perchiepetole vaiasse
Senza trovà pietate e tu nce ngrasse
Respundeme sacciammo
Che t’hai chiavato nchiocca
Dimme che buoi da me?
Ah ah ah ah me n’cha ncappato affè.

Me sonno no iorno
Vegliacco schefienza
Che senza pacientia
T’ammacco no cuorno.

M’hai redutto a no termene
Che me ne so scolato
Verbo gratia comm’a vuoglio petruoneco
E so fatto gilluto comm’a n’ietteco
E come fosse piecoro
Sempre faccio mbe mbe
Me n’cha ncappato affè.

Ma po dall’autra banta
N’ha corpa chella sgrata
Che m’ha n’sannonio
Comm’a cano muorto
Io so giovane bello io non so stuorto
Non so spuorco vanuso
Ma so tuosto saniccio e bertoluso
Me revota la capo
Pecché Cecca pe me fuorze non squaglia
Pecché n’haggio na maglia
Ca si corro da Trocchia
A Panecuocolo
Non me scappa na prubbeca
Già lo conosco e saccio che cos’è
Ah ah ah ah me n’cha ncappato affè.
Ma s’io sto liscio e sbriscio
A muro a muro proprio a lo spetale
Me pozzo ire a stendere allo muollo
Iettare a mare o rompere lo cuollo.