Assettato l’aut’hiere

Assettato l’aut’hiere
a na sponta de scuoglio
Cuosemo sbentorato
che pe Cecca crodele
arraggiava d’amore
sulo nfra de se stisso
cossì regnoleava lo scurisso.

Che pretiende da sto core
Cecca bella e gratiosa
se tu vide ca già more
pecché fare cchiù pertosa.

Co chiss’vuocchie affé ch’hai tuorto
de menare cchiù saette
quando ntutto n’hommo è muorto
so’ scompute le bennette.

Allecordate o sgrata
quanto me mpromettiste l’auta sera?
E mo’ che cosa è stata
fuorze non so’ chiù Cuosemo comm’era[?]

So’ lo stisso ncarne e nnossa
che pe te squaquiglio e moro
e porzì dinto la fossa
t’amarraggio quant’a l’oro.

Tu sì ca non si’ Cecca
non si’ cchiù chella ch’iere
pocca de st’vuocchie affritte
lo chianto a pisciariello
non te move na zechena
na zechena a pietate
o che gran canetate.

Vedere morire
no povero core
speruto accossì
chest’è terannia
che manco ntorchia
la fanno l’alì.

Cecca non ce vole auto
o contenta sto core
o da cca ncoppa
faccio zuffeta abbascio co no sauto.
Così iusto deceva
proprio comme se Cecca lo sentesse
quando da llà becino
a chell’erva addorosa
n’aseno co n’arraglio le respose.