Scheda n. 9901

Co no vorzillo asciutto
e n’arma annegrecata
Pachiochia lo scurisso,
che na botta tenea pe Cecca nzino,
co no spalleto viso
e na cera de mpiso,
llà dove sempe cantano li gruuoie
e la ranocchia strilla a no pantano,
facea [a]scì da lo pietto
sto trivolo e sta voce chiano chiano.

«Già lo strummolo de st’arma
me s’è fatto speretecchia.
Co na chella zuffa mpietto
non conosco cchiù arrecietto,
e sparuto da Paputo
me ne vao comm’a bessecchia.
Pe golìo de na sguancella
sputo nterra asciutto asciutto.
Paro tencha ch’è lanzata,
paro alice alla scapece,

paro miccio co la pece.
E chest’arma affomecata
iusto stà comm[’]a presutto.

Cecca, potta de nnico,
fa resella a bavone.
Non mbide comme struio
cchiù de sivo a scerocco?
Non siente ca gualeio
chiù de no gatto mascolo de marzo?
Tocca tocca ca vedarraie mporzì
sto core che porto pe ssa grazzia frezzaiato
comm’à no cannolicchio assottegliato.

Cecca bella, priesto ciernete:
non sentire cchiù sto riepeto
dimme sì e appriesso gabbame,
ca sto core pare trivolo,
chisto pietto sta ncentimmolo,
li penziere aimè me magniano.
E lo pinto fatto zaffio,
comm’avesse secotorio
contr’a st’arma affritta e misera,
me fà ì sempe à revociolà.