Scheda n. 7902

Oh cielo oh ammore o sciorta mia mmardetta
Pecché ve site tutte cognorate
Contra a mme poverella
Senz’avere tantillo de pietate?
Io squaglio comme squaglia la grandola
A lo sole pe chillo
Bello cuccopinto mio
E ppo mme sento dire
Lella è na torca
Na teranna cana
Nperzò dicite vuie
Oh stelle, oh ammore, oh cielo,
Si è bero ca pe isso, e ardo, e ghielo.

Se tu chiagne e mme vuo’ bene
Tu considera mo a me.
Songo troppo chelle ppene
Songo troppo le catene
Che mme legano ppe tte.

Titta tu t’allamiente
Ma nn’aie poca raggione
Lassa chiagnere a mmene
E fa sciabacco ca mme sento scrastà
lo core e ll’arma.
Io te parlo coll’uocchie
E tu non siente
E che buo’ che te dica
Vita di chisto core
Non mmi ca Lella toia pe tte se more.

Mamma mia pecché non siente
lo dolore ca a lo core
Mme fa sta sempe in tromiente,
Lassame chiagnere
Lassame fragnere
Chisto dolore
D’intr’a sto core
E so’ contenta
Che Titta senta
Lella se more
Sulo pe tte.